السلام عليكم ورحمة الله وبركاته
اخوتى الاعزاء اتمنى ان تكونوا بخير
الموضوع ده ابتدى الساعه الرابعه مساء بتوقيت الساعه اللي على الحيطه
وقلت لازم احكيه ليكم لتشاهدوا ما شاهدت في هذا اليوم :)
يمكن برضه تفيدونى للمستقبل
اللي حصل كالاتي
..
ليا صديقه عزيزة عليا قطتها خلفت سبع قطط قطاقيط عقبال عندكم
وبعد الحاح شديد منها وبعد معملتلي البحر طحينه ورجاءات وتوسلات لتخفيف الضغط عنها
اقنعتني معرفش ازاي واخدت منها واحده علشانها عاوزه تخلص منهم
وانا لا افقه شيئ في عالم الحيوانات وبخاف منهم واعاني من فوبيا الحيوانات منذ ان كنت صغيره
بس كان القدر اقوى مني ووافقت اني اخد القطه
وكل اللي قالتهولي شربيها حليب ياهديل علشان عمرها اسبوع ولسه مبتاكلش
قلت حاضر اكيد حشربها يعني شيفاني غبيه حقعدها من غير اكل ...
وكــــــــــانت العلقه الصعبه وابتدى مشوار القطه
كانت القطه بتنونو طوووول السكه طبعا محطوطه في كرتونه صغيره واحكمت قفل الكرتونه جيدااا
علشان متتحركش واخش انا وهيا في شجره
المهم
كنت فاكره ان النونوه عادي كل القطط بتنونو
رجعت البيت وبعد قصائد البهدله اللى سمعتها لمه والدي شافها
وقالي يا انتي يا القطه في البيت ههههههههههههههه
قلنا نشربها حليب قبل النوم احنا دخلنا على الساعه عشره بالليل
ويــــاحبة عيني من الساعه اربعه لعشره وهيا عماله بتنازع بسببي
جبنا الحليب بقت تبعد عنه وتنونو اكتر وتلف حوالين المكان بتدور على حاجه ضايعه منها
مش فاهمه حاجه بس حاسه ان فيه حاجه غلط بقيت اسال نفسي اعمل ايه
اتصلت بصحبتى الساعه واحده بعد منتصف الليل قولتلها الحقي القطه
قالتلي معلش معلش انتى سيبيها حتسكت لوحدها
اسيبها ازاي ياحجه بقولك ما اكلتش من ساعه مكنت معاكي
تقولي معلش معلش و جوزها كلمني وبيقولى معلش معلش اكليها زبادي
زبـــــــــــــاااادي !!!!
ايه هوا ده انتو مصدقتوا تخلصوا وله ايه العباره
قفلت الخط وبقيت ادور واعمل سيرش ما اسباب نونوت القطط
مفهمتش ولا حـــــاجه
سالت امي القطط بتاكل زبادي ؟ قالتلي جايز جربي كل حاجه لغايه متاكل
اوعي ياهديل تنامي والقطه ماكلتش ربنا حيعزبك زي مخدتيها وعزبتيها
ياااادي الحوسه
جبت الزبادي استحمت القطه بالزبادي ومش رااااضيه تاكل وبتنونو وبتلف حوالين نفسها
طيب وبعدين بقه في الوقعه السودا دي
بعد عناء تلات سعات من المحاولات لغايه الفجر سكتت وعينيها مليانه حزن
الحمد لله نامت لكن قلبي وجعني مكلتش حاجه من امبارح
وجينا تاني يوم الساعه عشره الصبح سامعه صوت بعييييد صحيت بقول لنفسي مين اللي بينونو بره
افتكرت خيبتى التقيله ونزلت اجري لقيتها بتغني موال امبارح
انا مش فاهمه حاجه قلت اشوف حد اشرحله الوضع الراهن
كلمت اختى خريجه علوم حيوان اكيد بتفهم برضه
قالتلي انه غلط تبعد عن مامتها لان مامتها اللى بترضعها
قلتلها والحل قالتلي جيبيلها بزازه
نععمممممممممممم بزازه ؟؟؟؟
رحت وجبت بزازه وقعدت ارضع فيها بصراحه كانت جعانه جداااااااااا
شربت شويه بس لسه بتنونو وبتلف تدور
قمت شفت هشااااااااااااام اخويا على النت
الاول بستفني و بعدين اعطانى درس في كيفيه تربيه القطط وازاي تروح الحمام
قلت يمكن مزنووقه وخصوصا انه فهمنى انها مستحيل تروح الا في المكان المخصص ليها
كل دروس هشام لم تفيد واخيرا قلت مبدهاااش ياهديل نروح المستشفى
البت حتموت مننا وذهبنا الى الطوارئ البيطريه
وبعد المعاينه اكتشفت ان القطه لازم ترجع لمامتها في اسرع وقت
لانى ممكن اقتلها بهبلي
وسريعا اتصلت بصديقتى وبعد مشوار طويل من العتاب بسبب المقلب اللي حطتنى فيه
قررنا عوده البنت لمامتها القطه شهر عقبال متكبر وينفع انها تبعد عن حضن امها
وكأن الغلبانه ياولداه حاسه باللي جرالها
والحمد لله رجعت القطه لحضن مامتها اللي كانت بتنونو برضه
وربنا ستر ...
ليست هناك تعليقات:
إرسال تعليق